Plantun de Prouvènço

Pèr coumpara dos planto d'encò nostre

Pilosella cymosa & Myricaria germanica

Pilosella cymosa

Asteraceae Compositae

Nom en français : Piloselle en cyme.

Descripcioun :
Aquesto peludello, bèn poulideto, trachis dins li tepiero seco e li prado de mountagno. En pleno flourido fai un paumo de flour sarrado eisado de recounèisse (pamens sèmblo à Pilosella ziziniana que porto mai de fueio sus sa cambo). De liuen sèmblo que i'a qu'un soulet "capitule" alor que n'i'a un mouloun de pichot. Coumpara emé la peludello-de-Ziz que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 30 à 100 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Pilosella
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 1 à 1,5 cm
Flourido : Printèms - Estiéu

Sòu : Ca
Autour basso e auto : 800 à 2200 m
Aparado : Noun
Mai à juliet

Liò : Tepiero seco
Estànci : Subremediterran à Subaupen
Couroulougi : Éurasiatico-Cèntre-Ouèst
Ref. sc. : Pilosella cymosa (L.) F.W.Schultz & Sch.Bip., 1862 (= Hieracium cymosum L., 1763 )

Tamarisso(-d'Alemagno)

Myricaria germanica

Tamaricaceae

Noms en français : Myricaire d'Allemagne, Petit Tamaris.

Descripcioun :
La tamarisso-d'Alemagno, dóu gènre Myricaria, trachis dins li limas de ribiero majamen en Mountagno. Li grano podon èstre empourtado mai bas. Douno d'èr à uno pichoto tamarisso, pamens l'enflourejado èi mai longo e pus espèsso emé de flour pu grando. I'a dous cop mai d'estamino que de petalo. Apoundèn que li flour soun bèn mai grosso e lou boursèu peréu (> 7 mm de long).

Usanço :
Coume pèr lis àutri tamarisso, la rusco èi diuretico, astringènto, sudorifico e aperitivo. Li jóuini pousso sarien bono pèr lucha contro lou manco de plaqueto sanguino.